Përmbytjet, katërfishohen çmimet e prodhimeve sezonale

::bud:: Kur qeveria i ka kthyer sytë nga bujqësia, sidomos nëse fiton mandatin e tretë, një e katërta e tokës bujqësore dhe prodhimit të saj është dëmtuar rëndë nga përmbytjet në Shkodër. Pa pritur se çfarë do të ndodhë në të ardhmen, në fakt pasojat e para kanë nisur. Një kilogram sallatë jeshile sot kushton 250 lekë të reja, në një kohë që një vit më parë nuk ishte më shumë se 50 lekë. Një kilogram kastravecë kushton plot 150 lekë të reja, nga rreth 100 lekë të reja që kushtonin tre kilogramë një vit më parë në këtë periudhë. Këto çmime, sipas vëzhgimeve tona, janë në tregun kryesor ushqimor në kryeqytet, tek “Uzina Dinamo”, që shërben si distributor për të gjithë kryeqytetin. Tregtarët i lidhin çmimet e larta të produkteve të sezonit kryesisht me përmbytjet në Ultësirën Perëndimore.

Efektet
Nga Nënshkodra deri në Lezhë një pjesë e madhe e tokës është ende nën ujë, ose gjysmë kënetë. Më pak fjalë, e papërdorshme. Fermerët ë zonës pohojnë se dëmet në bujqësi janë të pallogaritshme. Në këtë periudhë vitet e tjera bëhej prashitja e parë ose e dytë, ndërsa tani toka është ende nën ujë. Nuk kanë nisur ende mbjelljet. Ekspertët e bujqësisë në Shkodër kanë pohuar se 1900 hektarë nga toka e përmbytur kanë qenë mbjella, të cilat janë dëmtuar totalisht. Nga këto, më shumë se 7 hektarë përfaqësoheshin nga serat me perime. Ndërkohë që e gjithë vëmendja e politikës dhe opinionit në tërësi është kthyer nga zgjedhjet elektorale të 23 qershorit, toka nën ujë edhe në rreze të diellit do të shtrijë efektet në shumë sektorë të tyre. E para, çmimet e rritura qysh tani do të vijojnë edhe gjatë verës. Për shkak se tokat nga zona e Nënshkodrës deri në Lezhë përfaqëson një nga zonat më prodhuese në vend. Kështu ndodhi edhe në vitin 2010. Përmbytjet u shfaqen shumë më herët, në janar, por dhanë ndikime të jashtëzakonshme në prodhimet e zonës, duke reflektuar kështu çmime të larta në fruta dhe perime përgjatë gjithë verës. Përmbytjet e anashkaluara do të japin krismën më vonë në ritmet e rritjes ekonomike. Pasi, siç u verifikua edhe këtë vit, sektori i bujqësisë ka marrë timonin e rritjes së ekonomisë. Mazhoranca në qeveri ka premtuar se nëse fiton zgjedhjet, investimet nga rrugët do të zhvendosen në Bujqësi. As opozita nga ana tjetër nuk po përdor përmbytjet për kapital politik, pasi mori LSI-në në koalicionin bashkë me një pjesë të fajit për gjendjen. Disa fshatra kanë më shumë se një muaj nën ujë.

E ardhmja nga Bujqësia

Bujqësia ka nisur të marrë rolin që i takon në pjesën e përgjithshme të ekonomisë, por edhe të politikave të zhvillimit. Vitin që shkoi sektori njohu rritjen më të lartë prej 6 për qindësh, duke ndikuar plotësisht në mbajtjen në vlera pozitive të rritjes ekonomike. Mirëpo hapësirat për zhvillime të mëtejshme po i çojnë programet e dy partive kryesore drejt fshatit. Mazhoranca për shkak se e njeh problemin më thellë, se është në qeveri prej tetë vitesh, është shpërngulur totalisht në fshat. Opozita gjithashtu ka oferta joshëse, që synojnë lehtësira fiskale për fermerët.





Bujqësia shihet si një nga sektorët kryesorë, ku do të varet rritja ekonomike në të ardhmen. Partitë politike kanë përqendruar ofertat elektorale për fshatin. Por përmbytjet e këtij viti do të fashisin rezultatet e reale që pritej të sillte bujqësia këtë vit


Subvencion për fermerët e rinj, nis aplikimi


Fermerët, të cilët duan të përfitojnë subvencione nga Ministria e Bujqësisë, duhet të nisin aplikimet nga data 25 prill pranë Agjencisë për Zhvillimin Bujqësor dhe Rural. Në kuadër të projektit AZHBR, bën një thirrje të dytë për fermerët, të cilët kanë afat 45 ditë për të dorëzuar dokumentacionet përkatëse. Drejtori i AZHBR-së, Gjok Vuksani, shprehet se e veçanta e kësaj skeme të dytë është mbështetja edhe e bizneseve të reja. Ndërkohë që parashikohet edhe lehtësim dokumentacioni. Vuksani thekson se Ministria e Bujqësisë dhe AZHBR në veçanti ka kapacitet për trefishim të subvencioneve, pasi përpunohen rreth 12 mijë dosje në vit. Për afro 3 vjet, Ministra e Bujqësisë parashikon një bum prodhimesh të stimuluara nga këto subvencione, çka përkthehet në përmbushje të kërkesës vendëse edhe gjatë stinës së dimrit si dhe ulje të çmimeve për produktet bujqësore.

mapo.al

Komenti 1